இந்திய அணி 17 ஓட்டங்களால் வெற்றி...!
[2025-12-02 15:03:27] Views:[30]
தென்னாபிரிக்காவுக்கு எதிரான முதலாவது ஒருநாள் சர்வதேச போட்டியில் விராட் கொஹ்லியின் அபார சதத்தின் மூலம் 17 ஓட்டங்களால் வெற்றியீட்டிய இந்திய அணி மூன்று போட்டிகளைக் கொண்ட தொடரில் 1–0 என முன்னிலை பெற்றது.
கடந்த30 ஆம் திகதி நடைபெற்ற போட்டியில் முதலில் துடுப்பெடுத்தாட பணிக்கப்பட்ட இந்திய அணியின் சார்பில் கொஹ்லி 120 பந்துகளில் 11 பௌண்டரிகள் மற்றும் 7 சிக்ஸர்களுடன் 135 ஓட்டங்களை பெற்றார்.
இது கொஹலி ஒருநாள் போட்டிகளில் பெறும் 52 ஆவது சதமாகும். அதேபோன்று ஆரம்ப வீரர் ரோஹித் ஷர்மா (51) மற்றும் அணித் தலைவர் கே.எல். ராகுல் (60) ஆகியோர் அரைச் சதம் பெற்றனர். இதன்மூலம் இந்திய அணி 50 ஓவர்கள் முடிவில் 8 விக்கெட்டுகளை இழந்து 349 ஓட்டங்களைப் பெற்றது.
தொடர்ந்து பதிலெடுத்தாடிய தென்னாபிரிக்க அணி முதல் மூன்று விக்கெட்டுகளையும் 11 ஓட்டங்களுக்கு இழந்தபோதும் மத்திய வரிசை வீரர்கள் வெற்றிக்காக போராடினர். மத்தியூ பிரீட்ஸ்கே 80 பந்துகளில் 72 ஓட்கங்களை பெற்றதோடு மார்கோ ஜான்சன் 39 பந்துகளில் 70 ஓட்டங்களை விளாசினார்.
அதேபோன்று கொபின் போஸ்ச்சும் 51 பந்துகளில் 67 ஓட்டங்களை பெற்ற நிலையில் தென்னாபிரிக்க அணி கடைசி ஓவர் வரை விட்டுக்கொடுக்காமல் ஆடினர். எனினும் விக்கெட்டுகளை காத்துக்கொள்ள தவறியதாக தென்னாபிரிக்க அணி 49.2 ஓவர்களில் சகல விக்கெட்டுகளையும் இழந்த 332 ஓட்டங்களை பெற்றது.
