யாழ். மாவட்ட வேட்பாளர் மற்றும் பொலிஸார் இடையே விஷேட கலந்துரையாடல்; போட்டியிடும் 44 தரப்புக்களையும் உள்ளடக்கிய குழு நியமணம் !

[2024-10-17 11:45:45] Views:[14]

யாழ்ப்பாணம் தேர்தல் மாவட்டத்தில் நாடாளுமன்றத் தேர்தலில் போட்டியிடும் வேட்பாளர்களுக்கும் யாழ். பொலிஸாருக்கும் இடையில் கலந்துரையாடல் ஒன்று நடைபெற்றுள்ளது.

யாழ்ப்பாணம் பொலிஸ் நிலைய மாநாட்டு மண்டபத்தில் நேற்று (17) புதன்கிழமை முற்பகல் 10.00 மணியளவில் யாழ். பிராந்திய சிரேஷ்ட காவல்துறை அத்தியட்சகர் சூரிய பண்டார தலைமையில், யாழ். மாவட்டச் செயலகத்தின் மேலதிக மாவட்டச் செயலர் சிறிமோகனின் பங்கெடுப்புடன் இக்கலந்துரையாடல் இடம்பெற்றுள்ளது.

நாடாளுமன்றத் தேர்தல் காலங்களில் ஏற்படும் பிரச்சினைகள் மற்றும் வன்முறைகளைத் தடுக்கும் முகமாக குழு ஒன்று அமைக்க இதன்போது தீர்மானிக்கப்பட்டது.

அந்தவகையில், யாழ். பிராந்திய சிரேஷ்ட காவல்துறை அத்தியட்சகர் தலைமையில் கட்சிகள் மற்றும் சுயேச்சைக் குழுக்களின் உறுப்பினர்களை உள்ளடக்கிய 51 பேர் கொண்ட குழு அமைக்கப்படவுள்ளது.

இந்தக் குழுவில் தேர்தல் திணைக்கள அதிகாரிகள் மற்றும் காவல்துறையினர் சார்பில் 7 உறுப்பினர்களும், தேர்தல் மாவட்டத்தில் போட்டியிடும் கட்சிகள் மற்றும் சுயேச்சைக் குழுக்கள் சார்பில் 44 உறுப்பினர்களும் என மொத்தமாக 51 உறுப்பினர்களைக் கொண்ட குழு அமைக்கப்படவுள்ளது.

மேலும், வேட்பாளர்களின் பசுகாப்பு, தேர்தல் விதிகள், தேர்தல் பிரசார இடங்களுக்கு அனுமதி கோரல், ஒலிபெருக்கி சாதனங்களைப் பயன்படுத்தும் கால அளவு தொடர்பில் இதன்போது ஆராயப்பட்டதுடன், பொலிஸாரால் உரிய அறிவுறுத்தங்கள் தேர்தலில் போட்டியிடும் தரப்புக்களுக்கு வழங்கப்பட்டன.

இந்தக் கலந்துரையாடலில் யாழ். மாவட்ட மேலதிக அரச அதிபர் சிறீமோகன், பொலிஸ் உத்தியோகத்தர்கள், அரசியல் கட்சிகள் மற்றும் சுயேச்சைக் குழுக்களின் வேட்பாளர்கள் ஆகியோர் கலந்து கொண்டிருந்தனர்.